Eventos | Deportes

A cita comezará ás 11.00 horas na explanada xunto á ponte do Burgo e incluirá un paseo ciclista, exhibicións e un sorteo de agasallos

Culleredo celebrará este domingo, 5 de outubro, o seu primeiro Día da Bicicleta, unha xornada deportiva e familiar aberta a persoas de todas as idades. O paseo da ría do Burgo será o escenario desta iniciativa, que busca fomentar a práctica deportiva, os hábitos saudables e o goce da contorna natural do municipio.

A xornada comezará ás 11.00 horas coa apertura das inscricións na explanada situada xunto á ponte do Burgo. O paseo ciclista dará comezo ás 12.00 horas e transcorrerá integramente polo paseo marítimo da ría. Será obrigatorio o uso do casco para todas as persoas participantes.

A programación incluirá tamén unha exhibición de trial en bicicleta con xincana e unha demostración de bicicleta acrobática, que permitirán ao público gozar de diferentes modalidades e habilidades sobre dúas rodas.

Ás 13.00 horas terá lugar un sorteo de agasallos entre as persoas inscritas, con diferentes premios relacionados co deporte, o ocio e a gastronomía. Para participar será imprescindible estar inscrito previamente.

Como peche da xornada, ás 13.30 horas celebrarase unha exhibición de Dos Deporte, na que poderán participar todas as persoas asistentes.

Culleredo, un municipio vinculado ao deporte

A primeira edición do Día da Bicicleta servirá tamén para poñer en valor as posibilidades que ofrece Culleredo para a práctica de actividade física ao aire libre.

O Concello porá en marcha en outubro o seu programa municipal de actividades deportivas, que inclúe disciplinas como pilates, ioga e adestramento funcional, ademais de propostas ao aire libre como a marcha nórdica.

A estas actividades súmanse as iniciativas organizadas ao longo de todo o ano por entidades e clubs deportivos do municipio, como carreiras populares, trails de montaña, probas de orientación e rutas de sendeirismo.

Culleredo conta ademais con diferentes espazos para practicar deporte e gozar da natureza, entre eles o paseo marítimo, o monte Xalo, o Rego das Xesteiras e os sendeiros das zonas rurais. O paseo da ría do Burgo conecta tamén co paseo do río Trabe, en dirección a Vilaboa, e co paseo do Mero, que chega ata Cecebre, formando unha ampla ruta metropolitana.

Con esta primeira edición do Día da Bicicleta, Culleredo aposta polo deporte, a mobilidade sostible e a participación veciñal, cunha xornada aberta a familias e afeccionados nun dos principais espazos naturais do municipio.