Culleredo aproba 225 fogueiras e sardiñadas para esta noite de San Xoán
O Concello de Culleredo informa de que autorizou 225 solicitudes para realizar fogueiras, sardiñadas ou grelladas na noite de mañá domingo 23.
Durante esta noite, a Policía Local de Culleredo e o Servizo Municipal de Emerxencias conformarán un dispositivo especial por San Juan para atender calquera incidencia.
Neste sentido, inspeccionaranse todas as fogueiras comunicadas para verificar que cumpren coas condicións que se marca na normativa reguladora. De ser necesario ordenarase efectuar modificacións in situ, sobre todo para garantir as condicións de seguridade dos cidadáns.
O alcalde, José Ramón Rioboo, explica que San Juan é unha festa está moi arraigada en Culleredo. Por iso, sinala, elixiuse o 24 como festivo local para facilitar a participación nos festexos.
O Concello anima aos asistentes para actuar con responsabilidade para evitar incidencias e deixar as zonas en perfecto estado de limpeza. En calquera caso, haberá un servizo especial de limpeza para a mañá do luns.
Normas
Establécese como horario para poder realizar fogueiras desde as 18.00 horas do día 23 ata as 3.30 horas do 24. Deberán contar cunha separación mínima de 15 metros, tamén con elementos como vehículos e contedores, e non se poderán levar a cabo en parques infantís e zonas verdes, nin nas súas proximidades. Tampouco en calzadas, e en ningún caso poden entorpecer o tráfico.
Para as fogueiras non está permitido o uso de combustibles ou acelerantes. Deberá existir no chan unha protección de area ou materiais similares. O bando municipal tamén inclúe a obrigación de limpeza ao finalizar, comprobando que se atopa efectivamente apagada e restablecendo as mesmas condicións de seguridade, hixiene e ornato público.