Culleredo abre o prazo das 'Mañás de Campamento' para facilitar a conciliación das familias no verán
O Concello de Culleredo volverá poñer en marcha este verán as 'Mañás de Campamento', unha iniciativa pensada para apoiar a conciliación das familias durante as vacacións escolares e ofrecer ao mesmo tempo unha alternativa de lecer educativo para a infancia do municipio.
O programa desenvolverase entre o 22 de xuño e o 28 de agosto e está dirixido a nenas e nenos de entre 3 e 12 anos que estean empadroados en Culleredo e teñan matrícula vixente en Educación Infantil ou Primaria. A proposta combinará actividades lúdicas e formativas, con xogos, obradoiros e iniciativas ao aire libre adaptadas ás distintas idades, sempre que as condicións meteorolóxicas o permitan.
Ao longo do verán, as e os participantes poderán achegarse a ámbitos como a ciencia, a música, a historia, as artes ou a natureza. Ademais, o programa buscará reforzar valores como o respecto, a integración, a tolerancia e o traballo en equipo.
A oferta estrutúrase en dúas modalidades. Por unha banda, haberá campamentos extensos, cunha duración de entre tres e catro semanas, que se celebrarán no CEIP Isaac Díaz Pardo para Infantil e no CEIP Sofía Casanova para Primaria. Por outra, organizaranse campamentos curtos de dúas semanas no CEIP Vila de Rutis. En todos os casos, o horario das actividades será de 9.00 a 14.00 horas.
Cada familia poderá solicitar un campamento extenso ou un máximo de dous campamentos curtos, sempre que non sexan consecutivos. O prezo da inscrición oscilará entre 42 e 84 euros, cun custo de 21 euros por semana. Ademais, ofreceranse servizos complementarios de almorzo, de 7.30 a 9.00 horas, e de comida, de 14.00 a 16.00 horas, cun recargo adicional.
Co obxectivo de facilitar o acceso ao programa, o Concello aplicará bonificacións na matrícula. As familias numerosas terán unha rebaixa do 50 por cento, mentres que o segundo menor inscrito dunha familia non numerosa contará cun desconto do 20 por cento. No caso de existir informe da Área de Cohesión Social, establécese ademais unha tarifa especial gratuíta.
O prazo de inscrición abrirase o luns 13 de abril e permanecerá aberto ata o 22 de abril ás 13.00 horas. As solicitudes deberán presentarse preferentemente a través do formulario habilitado na páxina web do campamento. De maneira alternativa, tamén poderán entregarse no Edificio de Servizos Múltiples entre as 9.00 e as 14.00 horas, aínda que o último día o rexistro pechará ás 13.00 horas.
A lista provisional de persoas admitidas publicarase o 4 de maio. Se a demanda supera a oferta de prazas, celebrarase un sorteo público o 8 de maio. A listaxe definitiva coñecerase o 11 de maio e, a partir desa data, abrirase o prazo de matrícula ata o 22 de maio.