Eventos

O auditorio de Afundación acollerá desde as 20.00 horas unha cita aberta á cidadanía con alfombra amarela, actuacións en directo e moitas sorpresas

CUAC FM continúa este sábado coa programación especial do seu 30 aniversario coa celebración da gala dos Premios OsCuacs, unha das citas máis emblemáticas da emisora comunitaria coruñesa. O evento terá lugar ás 20.00 horas no auditorio de Afundación, no Cantón Grande, e contará con entrada gratuíta ata completar a capacidade da sala.

A gala abrirá as súas portas a toda a cidadanía para compartir unha noite de radio, humor e celebración. Como cada ano, os Premios OsCuacs recoñecen os mellores programas e profesionais da emisora en distintas categorías, como produción, locución, técnica ou contidos. Iso si, mantendo o espírito desenfadado que caracteriza esta tradición interna da radio comunitaria, na que o importante non é competir, senón compartir unha xornada de encontro entre as persoas que forman parte do proxecto.

Con motivo do 30 aniversario, a entrega de premios dará un paso máis e converterase nunha auténtica gala, con alfombra amarela, photocall, actuacións musicais en directo e outras sorpresas preparadas pola organización para conmemorar tres décadas de emisións na cidade.

CUAC FM leva desde 1996 apostando por un modelo de comunicación participativo e aberto á cidadanía, converténdose nun espazo de referencia para centos de colaboradores e colectivos sociais da Coruña. A emisora desenvolve durante este ano unha ampla programación de actividades para celebrar o seu aniversario e poñer en valor a traxectoria dun proxecto único no panorama radiofónico galego.

A gala dos Premios OsCuacs conta coa colaboración do Concello da Coruña a través da Concellaría de Cultura e Turismo e aspira a reunir tanto á comunidade da emisora como ao público que queira achegarse a coñecer de preto unha das iniciativas de comunicación comunitaria máis veteranas de Galicia.