Eventos

A novena edición do festival celebrarase do 6 ao 17 de maio baixo o lema 'Unha cidade que acolle, unha cultura que transforma'

Corufest celebrará do 6 ao 17 de maio a súa novena edición cunha programación que volverá situar a diversidade afectivo-sexual, a identidade e a memoria no centro da creación cultural. O festival de artes escénicas pola diversidade LGTBIQ+ ofrecerá na Coruña propostas de teatro, danza, música, literatura, encontros e mediación cultural, con entradas xa dispoñibles.

Baixo o lema 'Unha cidade que acolle, unha cultura que transforma', o certame propón unha lectura da cultura como ferramenta de diálogo e cambio social. A programación desenvolverase en espazos como o Teatro Colón, o Teatro Rosalía de Castro, o Centro Ágora, o Centro Cívico dos Mallos, a Casa Museo Casares Quiroga e Galgo Azul, creando un percorrido pola cidade arredor das novas narrativas da diversidade.

A apertura será o mércores 6 de maio, ás 20.30 horas, no Teatro Colón, co concerto de O Xoán, proxecto musical do actor e creador galego Xoán Fórneas. A partir de aí, o festival combinará linguaxes escénicas e propostas de reflexión, con pezas que abordan a identidade, o corpo, a memoria trans, a diversidade funcional, a escritura disidente e os dereitos culturais.

Entre as citas destacadas figura a entrega do Recoñecemento Samuel Luiz ao compromiso social coa visibilidade LGTBIQ+, que este ano recaerá en Boti García Rodrigo. Será o xoves 7 de maio, ás 19.30 horas, na biblioteca municipal do Centro Ágora, nunha xornada que tamén incluirá o encontro 'Escritas desbordadas: Narrar o que incomoda'.

A danza terá un papel relevante nesta edición con espectáculos como 'Orgía', o venres 8 de maio no Teatro Rosalía de Castro, e 'Nik·Eu 2.0', o sábado 16 de maio no Centro Ágora. O teatro chegará con propostas como 'Manual para follarse a un macho con vagina', o sábado 9 no Centro Cívico dos Mallos; 'Manual básico de lengua de signos para romper corazones', o mércores 13 no Teatro Colón; e 'Caballito de mar', de Pau Coya, o xoves 14 no Teatro Rosalía.

A memoria histórica tamén estará presente coa exposición 'Maricones y travestis a la calle', de Sergio Marey, que poderá verse na Casa Museo Casares Quiroga ata finais de mes. A mostra recupera a figura da coruñesa Trinidad Falcés, 'Trini', muller trans represaliada durante o franquismo, e busca dar visibilidade a unha parte silenciada da historia das loitas LGTBIQ+.

O festival pecharase o domingo 17 de maio, coincidindo co Día das Letras Galegas e co Día Internacional contra a Homofobia, a Transfobia e a Bifobia, cun encontro no Galgo Azul co escritor, profesor e activista galego Ismael Ramos, unha das voces máis recoñecidas da literatura galega actual.

Con esta nova edición, Corufest consolídase como un espazo cultural de referencia para pensar a diversidade desde a creación artística, a memoria colectiva e a participación cidadá.