Contos, teatro e propostas feministas para encher marzo nas bibliotecas de Oleiros polo 8M
As bibliotecas municipais de Oleiros súmanse un ano máis á conmemoración do Día da Muller (8M) cun programa especial que converte marzo nun mes cheo de actividade. A proposta céntrase, sobre todo, na Hora do conto, con sesións pensadas para público infantil e familiar, nas que se traballan valores de igualdade e relatos de temática feminista.
A programación arrinca o 4 de marzo en Santa Cruz con 'A viaxe de Piruleta', a cargo de Ariadna Ligero, dirixida a crianzas de 2 a 4 anos. Ao día seguinte, o 5, haberá dobre cita: en Lorbé, 'Lúa quere viaxar a Marte' con A Xanela do Maxín (de 2 a 4 anos) e, en Rialeda, 'Canta, Bugina, canta!' con Marta Ortiz (de 2 a 4 anos). O 6 de marzo será a quenda de Mera con 'Dúas heroínas voando van', de Raquel Crespo, para maiores de 5 anos.
A seguinte semana continúa a oferta: o 9 de marzo, en Dorneda, Soraya Lema presentará 'Aitana e a avoa e outros contos violetas' (para maiores de 5 anos). O 10 de marzo, a biblioteca de Oleiros recupera 'Lúa quere viaxar a Marte' con A Xanela do Maxín, xa para público maior de 5 anos, e o 13 de marzo en Nós haberá teatro con Trémola e a proposta 'Vamos ao recreo', tamén para maiores de 5 anos.
Ademais das actividades abertas, prográmanse sesións específicas para alumnado dos centros educativos con contidos vinculados á igualdade. Un exemplo é 'Directas ao espazo', de Trémola, previsto para o 6 de marzo na Biblioteca Rosalía de Castro de Santa Cruz, dirixido ao alumnado de infantil do colexio Isidro Parga Pondal.
Como complemento, todas as bibliotecas acollerán exposicións bibliográficas arredor da muller, co obxectivo de visibilizar autoras, títulos e recursos para seguir afondando no 8M dende a lectura.