Concertos, portas abertas e intercambio de libros para festexar mañá o Día do Libro
O Día do Libro deixará mañá, xoves 23 de abril, unha axenda especialmente intensa na Coruña e en varios concellos da súa contorna. A cidade volverá concentrar a oferta máis ampla, pero Culleredo, Oleiros, Bergondo e Ordes tamén teñen xa pechadas propostas para celebrar unha xornada que este ano combinará música, reflexión sobre a lectura, portas abertas, actividades infantís e circulación de libros entre lectoras e lectores.
Na Coruña, a programación municipal xirará arredor do lema 'Un libro, unha historia'. O acto central será o faladoiro 'A lectura é un dereito humano?', previsto para as 19.30 horas na Biblioteca Municipal de Estudos Locais, con Fernando Flores e Daniel Granados. A iso sumarase a gala lírica e literaria da Banda Municipal de Música no Centro Ágora, ás 20.00 horas e con acceso libre ata completar capacidade. A xornada completarase coas soltas de libros na contorna das bibliotecas municipais, mostras temáticas e un mural literario participativo.
A capital coruñesa engadirá ademais outras dúas citas destacadas fóra da programación estritamente municipal. A Biblioteca Histórico Militar da Coruña abrirá as súas portas de 9.00 a 14.00 e de 17.00 a 19.00 horas, cunha exposición vinculada ao 250 aniversario da contribución militar española á independencia dos Estados Unidos e cun reparto de libros expurgados. Pola súa banda, a Biblioteca Provincial da Deputación acollerá ás 18.30 horas a presentación de 'Os libros durmidos', de María Canosa e Laura Suárez, e organizará tamén unha visita guiada polos seus fondos máis singulares, con reserva previa.
En Culleredo, o Concello apostará por unha proposta de perfil divulgativo e musical. A Biblioteca Xosé Cardeso Liñares, en Vila Melania, acollerá ás 19.00 horas o concerto-conferencia 'A música dos deuses', centrado na mitoloxía clásica como fonte de inspiración musical. A sesión combinará explicacións, interpretación en directo e proxeccións audiovisuais, nun formato pensado para abrir o Día do Libro a públicos diversos.
Oleiros volverá converter a súa rede de bibliotecas nun dos motores da celebración. Bibloleiros programou ao longo de abril actividades de promoción lectora, pero o propio 23 de abril concentra varias citas, entre elas 'A Odisea en 50'' e 'Fogóns poéticos' na Biblioteca Central Rialeda, en Perillo, ademais da sesión 'Avións de papel'. Xunto a iso, o municipio mantén exposicións bibliográficas en diferentes centros, recomendacións lectoras para todos os públicos, elaboración de marcapáxinas en Lorbé e Dorneda e o agasallo dun libro na biblioteca de Santa Cruz para as persoas usuarias que cheguen a cinco préstamos co seu carné.
Entre os concellos da área, Bergondo contará cunha das propostas máis prácticas da xornada. A Biblioteca Municipal organizará un intercambio de libros aberto a exemplares infantís, xuvenís e de adultos. Haberá dous puntos e dous horarios: de 10.00 a 13.00 horas na sala infantil e xuvenil da Senra e de 16.00 a 20.00 horas na Axencia de Lectura. A mecánica é sinxela: levar un ou dous libros xa lidos e cambiarllos por outros. En Ordes, a celebración chegará da man da campaña 'Un conto para Ordes', impulsada por AECOR en colaboración co Concello, que remata mañá e inclúe un contacontos ás 17.30 horas nos baixos da Alameda para as persoas que mercasen libros nos establecementos participantes.