Comezan as obras da nova urbanización en Pedralonga para recolocar aos afectados polo Novo CHUAC
A Xunta de Galicia iniciou as obras de urbanización na zona de Pedralonga, en A Coruña, destinadas á reubicación dos propietarios expropiados pola construción do Novo Hospital da Coruña (Novo CHUAC). Este proxecto, cun investimento de 3,5 millóns de euros, forma parte do Proxecto de Interese Autonómico que busca facilitar a reubicación das persoas afectadas pola ampliación do complexo hospitalario.
As obras terán un prazo de execución de doce meses e permitirán a creación de 17 vivendas unifamiliares, todas elas para os propietarios que decidiron optar pola reubicación. Estes recibirán parcelas urbanizadas en Pedralonga como parte da compensación pola expropiación, permitindo que construan as súas novas vivendas.
A área de urbanización cubrirá 29.075 metros cadrados entre a avenida de Pedralonga-Monserrat e a avenida da Pasaxe. A nova zona contará con 2.936 metros cadrados de espazos verdes, 70 metros cadrados de zona comercial, 2.599 metros cadrados de equipamento público e 70 prazas de aparcadoiro, das que 34 serán de titularidade pública e 36 privadas.
Un dos aspectos principais da intervención será a mellora do Camiño Inglés a Santiago, co alargamento da senda peonil na avenida de Pedralonga-Monserrat ata os 6 metros e a integración de arborado ao longo do percorrido. Estas actuacións mellorarán a paisaxe, a accesibilidade e a preservación do patrimonio histórico e cultural, en beneficio tamén dos peregrinos que transitan pola zona.
O novo viario residencial será diseñado cun tráfico lento e preferencia para os peóns, mellorando así a seguridade e a calidade de vida dos veciños.