Comeza na Coruña a I Feira Artesá de Nadal nos xardíns de Méndez Núñez
A cidade da Coruña acolle desde hoxe, 20 de decembro de 2024, a primeira edición da Feira Artesá de Nadal, que estará situada nos xardíns de Méndez Núñez ata o 5 de xaneiro. A iniciativa, organizada pola Asociación Galega de Artesáns en colaboración co Concello da Coruña, busca poñer en valor a artesanía galega como motor cultural e económico.
Os concelleiros Gonzalo Castro, de Cultura e Turismo, e Diana Cabanas, de Emprego, Comercio e Mercados, visitaron esta mañá os catorce expositores que participan nesta primeira edición. Durante o acto, destacaron a importancia de apoiar o comercio local e promocionar os oficios tradicionais de Galicia, como a cerámica, a xoiaría e a fabricación de instrumentos musicais.
A feira abrirá ininterrompidamente en horario de 12:00 a 21:00 horas e ofrecerá ao público a oportunidade de coñecer produtos únicos, elaborados por artesáns como os coruñeses Chueco (coiro), Paz Navas e Onda (xoiaría), entre outros de diversas localidades galegas. “Queremos achegar á cidadanía produtos de calidade e con selo de país, fomentando as compras responsables nesta época de Nadal”, sinalou Gonzalo Castro.