Coirós programa un taller para comprender o comportamento infantil desde a educación en igualdade
O Concello de Coirós impulsa unha nova proposta formativa centrada na crianza e na convivencia en igualdade. Trátase do taller 'Educando para a Igualdade', que estará conducido pola logopeda e psicóloga María Soto, coñecida polo seu traballo arredor da Disciplina Positiva e como fundadora do proxecto Educa Bonito.
As sesións desenvolveranse en catro datas (27 de xaneiro, 10 e 24 de febreiro e 10 de marzo) e terán unha duración de dúas horas, entre as 17.15 e as 19.15, no edificio de usos múltiples.
Segundo explica a propia relatora, as xornadas pretenden axudar ás familias a comprender os motivos que están detrás de determinadas condutas na infancia e, ao tempo, achegar ferramentas prácticas para unha educación respectuosa e eficaz, orientada a construír relacións máis xustas e igualitarias no día a día.
A inscrición é necesaria e debe formalizarse a través do formulario dispoñible na web municipal.
