Chamamento ao aforro de auga ante a falta de choivas en Betanzos
A escaseza de precipitacións que afecta a Galicia e a previsión de que esta situación se prolongue durante as vindeiras semanas levaron ao Concello de Betanzos a facer un chamamento á veciñanza para fomentar un consumo responsable da auga e contribuír á conservación das reservas hídricas.
A administración local lembra que a Xunta de Galicia mantén a situación de prealerta por escaseza en varias zonas da comunidade e recomenda aos concellos impulsar medidas preventivas de aforro para evitar que no futuro sexa necesario adoptar restricións no abastecemento.
A alcaldesa, María Barral, destacou que 'a mellor ferramenta para garantir o abastecemento é a colaboración de todos e todas. Pequenos xestos diarios supoñen un importante aforro de auga e contribúen a preservar un recurso esencial'.
Para favorecer un consumo máis racional, o Concello difundirá unha campaña informativa con diferentes consellos prácticos para reducir o gasto de auga nos fogares. Entre as recomendacións figuran ducharse en lugar de bañarse, reducir o tempo baixo a auga, pechar a billa mentres se lavan os dentes ou se enxaboan os pratos, utilizar a lavadora e o lavalouzas só cando estean a plena carga e revisar posibles fugas en billas e cisternas.
A campaña tamén anima a reutilizar a auga para outros usos domésticos sempre que sexa posible, evitar o rego nas horas centrais do día, empregar auga de choiva para o coidado das plantas, non utilizar mangueiras para limpar patios, beirarrúas ou vehículos, cubrir as piscinas para reducir a evaporación e pechar a chave xeral da vivenda cando se permaneza varios días fóra.
María Barral lembrou que 'Betanzos non é alleo aos efectos do cambio climático e debemos actuar con responsabilidade. O aforro de auga é unha tarefa compartida na que cada pequeno xesto conta'.
O Concello continuará realizando un seguimento permanente da situación en coordinación coa empresa concesionaria do servizo e cos organismos competentes, ao tempo que manterá informada á cidadanía de calquera novidade relacionada coa evolución das reservas e do abastecemento.