Catro propostas de autoría feminina gañan os X Premios María Luz Morales e afondan na historia e representación do audiovisual
A décima edición dos Premios María Luz Morales de ensaio e videoensaio sobre o audiovisual xa ten gañadoras. Os catro galardóns recaeron este ano en propostas de autoría feminina que abordan diferentes aspectos da representación, a memoria e a análise crítica do audiovisual galego e internacional.
A entrega dos premios celebrouse este xoves na Deputación de Lugo, nun acto no que participaron representantes da Academia Galega do Audiovisual e das deputacións da Coruña, Lugo e Ourense, ademais de integrantes do xurado.
Os premios, impulsados pola Academia Galega do Audiovisual co apoio das catro deputacións galegas, buscan fomentar a investigación e a reflexión arredor do audiovisual. Ao longo das dez edicións presentáronse 237 traballos, dos que 89 estiveron centrados especificamente no audiovisual galego.
Os catro traballos premiados
Na categoría de Mellor ensaio escrito sobre audiovisual galego, o premio foi para O cinema sobre o papel: interpretación da sétima arte na obra xornalística e editorial de María Luz Morales, de Alba María Moledo Ucha. O traballo recupera a relación da xornalista, crítica e editora María Luz Morales co cinema e afonda na súa contribución á cultura cinematográfica.
O Mellor videoensaio sobre audiovisual galego foi para Un caderno dixital: A lesbiana no audiovisual galego, de Lucía Estévez González. A proposta percorre diferentes obras e personaxes para analizar a representación das mulleres lesbianas no audiovisual galego, así como a evolución dos estereotipos e das formas de representación.
No apartado internacional, o Mellor ensaio escrito sobre audiovisual internacional recoñeceu Odiar os luns. Unha reflexión sobre ficción audiovisual, traballo e clase, de Uxía Bereixo. O ensaio relaciona a análise de diferentes obras coa experiencia do espectador e con cuestións sociais vinculadas ao traballo e á clase.
Por último, o Mellor videoensaio sobre audiovisual internacional foi para Como despezar o corpo feminino na pantalla, de Sara Calvete Lorenzo, unha proposta centrada na representación do corpo das mulleres no audiovisual e que emprega os recursos propios do formato para desenvolver a súa análise.
Unha década dedicada á investigación audiovisual
Durante o acto, a presidenta da Academia Galega do Audiovisual, Lucía Veiga, puxo en valor a traxectoria dos premios e o seu papel como espazo para a investigación, o pensamento e a creación arredor do audiovisual.
A deputada de Cultura da Deputación da Coruña, Natividade González, tamén destacou a importancia de alcanzar a décima edición e defendeu a necesidade de apoiar non só a creación e produción audiovisual, senón tamén os procesos de investigación e análise que permiten estudar as obras e construír memoria arredor delas.
Os Premios María Luz Morales foron creados como unha convocatoria pioneira no Estado neste ámbito e manteñen na actualidade o seu carácter específico para o ensaio sobre audiovisual galego.
O xurado desta edición estivo formado pola artista visual e xestora cultural Aldara Pagán, a profesora da Universidade da Coruña e especialista en comunicación Finocha Formoso e a comunicadora e xestora Miriam Rodríguez.
Os galardóns toman o seu nome de María Luz Morales, nacida na Coruña en 1889 e falecida en Barcelona en 1980. Foi unha das pioneiras da crítica cinematográfica en España e unha figura destacada do xornalismo cultural do século XX.