Castañas, obradoiros e compras con premio para celebrar o Magosto en Arteixo
O outono chega con sabor a castaña a Arteixo. A Asociación das Empresas de Arteixo (AEMA) organizará este venres, 9 de outubro, unha programación especial para celebrar o tradicional Magosto, cunha proposta que combinará actividades creativas para diferentes idades e unha iniciativa para incentivar as compras no comercio local.
Entre as propostas figuran dous obradoiros impartidos por Un Mar de Cores. O público infantil poderá participar en 'Magosto de Cores', unha actividade na que os máis pequenos traballarán con follas, castañas e outros elementos propios do outono para crear as súas propias composicións.
Para os adultos, 'Tintes de Magosto' permitirá experimentar con tintes naturais e descubrir as posibilidades creativas que ofrecen diferentes elementos da natureza. Para participar en calquera dos dous obradoiros será necesario realizar unha inscrición previa a través da páxina web de AEMA e presentar un ticket de compra superior a 10 euros nun dos establecementos asociados.
A celebración terá tamén unha recompensa en forma de castañas. As persoas que realicen compras superiores a 10 euros nos comercios adheridos ata o propio venres 9 recibirán un ticket para conseguir un cucurucho de castañas de balde, ata esgotar existencias.
O canxe dos tickets poderá realizarse durante a tarde do venres, entre as 18.00 e as 20.30 horas, no posto do castiñeiro que se instalará na avenida do Balneario.
A iniciativa conta coa colaboración da Xunta de Galicia, Comercio Galego, Deputación da Coruña e Concello de Arteixo e busca unir a celebración dunha tradición propia do outono co apoio ao comercio e ás empresas locais.
AEMA, anteriormente coñecida como CCA Arteixo, é unha asociación empresarial sen ánimo de lucro que reúne empresas, persoas autónomas e proxectos emprendedores de diferentes sectores e traballa na representación e dinamización do tecido económico do municipio.