Case 150 nadadores participaron na Coruña nos XXVIII Xogos Autonómicos de Natación de Special Olympics
A Coruña converteuse este sábado no escenario dunha nova cita co deporte inclusivo coa celebración dos XXVIII Xogos Autonómicos de Natación de Special Olympics Galicia. A competición reuniu na piscina municipal de Riazor un total de 148 nadadores e nadadoras con discapacidade intelectual procedentes de 15 entidades das catro provincias galegas.
A xornada congregou 237 persoas, entre deportistas, adestradores e persoal de apoio. A organización contou coa participación de 36 adestradores e 53 persoas dedicadas ao voluntariado, á cronometraxe, ás emerxencias e ás tarefas organizativas. Entre as entidades participantes estivo Aspronaga, asociación coruñesa promotora desta edición, que acudiu con nove deportistas e dous adestradores.
O Concello da Coruña colaborou na celebración desta competición, organizada por Special Olympics Galicia e promovida por Aspronaga. O concelleiro de Deportes, Manuel Vázquez, destacou a importancia de garantir que todas as persoas poidan acceder á práctica deportiva nas mesmas condicións e sinalou o papel das instalacións deportivas e do tecido asociativo na construción dunha cidade máis inclusiva.
O edil tamén puxo en valor o traballo de Special Olympics Galicia e Aspronaga para fomentar a actividade física entre as persoas con discapacidade intelectual.
Probas adaptadas a diferentes capacidades
A competición comezou cun acto inaugural no Pazo dos Deportes de Riazor, no que as delegacións participantes desfilaron antes da lectura do lema de Special Olympics Galicia por parte dun deportista de Aspronaga: 'Quero gañar, mais se non o consigo, deixádeme ser valente no intento'.
A continuación, os nadadores e nadadoras participaron en diferentes probas adaptadas aos seus niveis e capacidades. O programa incluíu distancias de 25, 50 e 100 metros nos estilos libre, costas, braza e bolboreta, ademais de competicións de remudas e modalidades con elementos de flotación.
Ao finalizar as probas, deuse a entrega do Premio ás Boas Prácticas no Deporte de Special Olympics Galicia, un recoñecemento que distingue valores como a deportividade, o compañeirismo, o xogo limpo e o respecto ás normas.