Cartas, bingo e dominó para activar as tardes en Paderne
Paderne estrea desde hoxe unha nova proposta para fomentar o lecer compartido e a convivencia entre a veciñanza. O Concello pon en marcha este luns 23 de marzo a iniciativa 'Dinamizando Paderne', unha actividade pensada para ofrecer espazos de encontro arredor dos xogos tradicionais e doutras dinámicas de grupo. A primeira cita celebrarase no Fogar do Maior a partir das 17.00 horas.
As persoas que se acheguen poderán participar en partidas de cartas, bingo, dominó e noutros xogos preparados pola monitora encargada de conducir a sesión. A proposta busca converter estas xornadas nun punto de reunión aberto á participación veciñal, cun formato sinxelo pero pensado para favorecer a socialización e o entretemento nun ambiente distendido.
A programación terá continuidade o mércores 25 de marzo, coa chegada da iniciativa á parroquia de Vigo. Neste caso, a actividade desenvolverase entre as 18.15 e as 20.15 horas, ampliando así o alcance dun programa co que o Concello pretende levar alternativas de ocio a distintos puntos do municipio e animar á veciñanza a compartir tempo e actividades.