Carral reúne o 26 de setembro a xogadores de toda Galicia no seu XII Torneo de Xadrez de Verán
O xadrez volverá ter protagonismo en Carral o próximo sábado 26 de setembro coa celebración do XII Torneo de Xadrez de Verán, unha cita deportiva que reunirá no municipio participantes de diferentes puntos de Galicia.
A competición desenvolverase no Pavillón Municipal O Espiño a partir das 16.00 horas e disputarase mediante o sistema suízo a sete roldas, cun ritmo de dez minutos máis tres segundos por xogada.
O torneo contará con catro categorías: Sub-10, Sub-14, Absoluta e Mellor Local. As persoas interesadas en participar poderán formalizar a súa inscrición ata o 25 de setembro, tanto presencialmente no Complexo Deportivo como a través do formulario habilitado na web municipal.
Un torneo con presenza de toda Galicia
A competición está xa consolidada dentro do calendario deportivo de Carral e nas últimas edicións conseguiu atraer xogadores e xogadoras procedentes das catro provincias galegas.
Na pasada edición participaron 62 persoas, cunha presenza especialmente destacada de nenos e nenas. De feito, nas últimas convocatorias a participación infantil e xuvenil chegou a superar o 50 % do total. O dato reflicte o interese crecente que está a espertar o xadrez entre a poboación escolar e o aumento da participación nunha disciplina que conta cunha presenza menor que outros deportes.
O Concello de Carral aposta por continuar achegando o xadrez á veciñanza e, especialmente, ás idades máis novas, facilitando o acceso á práctica deportiva e creando espazos nos que persoas de diferentes idades e procedencias poidan competir e compartir experiencia.
O peche do deporte de verán dá paso ás escolas municipais
O XII Torneo de Xadrez de Verán terá ademais un significado especial dentro do calendario deportivo municipal, xa que servirá para poñer o peche ao programa de actividades deportivas de verán. A partir de aí dará comezo o novo curso deportivo de inverno, que terá como principal eixo o programa de Escolas Deportivas Municipais.
Coa celebración desta nova edición do torneo, Carral mantén así a súa aposta por unha disciplina que, segundo destaca o Concello, incrementa progresivamente o número de participantes ano tras ano, especialmente entre os escolares.
Para resolver dúbidas ou obter máis información, as persoas participantes poden contactar co Complexo Deportivo no teléfono 678 33 88 47 ou no correo electrónico complexo.deportivo@carral.es.