Carral recupera a súa Carreira Popular tras máis dunha década cunha multitudinaria XXIII edición
Carral recuperou unha das súas citas deportivas máis tradicionais coa celebración da XXIII Carreira Popular, unha proba que regresou ao calendario local tras máis dunha década sen organizarse. A iniciativa, promovida conxuntamente polo Concello e a Comisión de Festas de Carral, contou cunha ampla participación e cunha notable resposta do público que se achegou para seguir o desenvolvemento da xornada.
Ao evento asistiron o alcalde, José Luis Fernández Mouriño, e o concelleiro de Deportes, Óscar Bodelo, quen participou tamén no acto de entrega de premios aos vencedores das diferentes categorías.
Durante a súa intervención, o responsable municipal de Deportes destacou a relevancia de recuperar unha proba cunha longa traxectoria no municipio e sinalou a boa acollida que tivo o regreso desta cita entre a veciñanza. Ademais, explicou que a recuperación da Carreira Popular formaba parte dos obxectivos marcados polo actual Goberno local.
A competición contou con categorías masculinas e femininas adaptadas ás diferentes idades e distancias. Na categoría benxamín, sobre un percorrido de 900 metros, os primeiros postos foron para Celtia López e Lucas Botana. Entre os alevíns, tamén sobre 900 metros, impuxéronse Enma Blanco e Rubén Caamaño.
Na categoría infantil, cun percorrido de 1.800 metros, os vencedores foron Icía López e Mario Llamas, mentres que en cadete, tamén sobre 1.800 metros, Pedro Llamas logrou a primeira posición. Na categoría xuvenil, disputada sobre unha distancia de 8.500 metros, o triunfo foi para Ismael Fuertes.
Na categoría sénior masculina o primeiro posto correspondeu a Daniel Loureiro, mentres que en feminina a vitoria foi para Estefanía Fernández. Entre os veteranos, Junior Javier Vázquez foi o máis rápido na categoría masculina, mentres que Lorena Ponte acadou a primeira posición na feminina.
Na clasificación xeral masculina por tempos, Daniel Loureiro logrou a medalla de ouro, seguido por Junior Javier Vázquez, que foi prata, e Michele Spinazzola, que completou o podio co bronce.
Pola súa parte, o podio feminino por tempos estivo integrado integramente por atletas da categoría veterana. Lorena Ponte ocupou a primeira posición, seguida por Isa Cabanas e Natala Arcay.
A xornada deportiva arrancou ás 11:00 horas con saídas escalonadas segundo as diferentes categorías participantes. As probas das modalidades xuvenil, sénior e veteranos foron as últimas en celebrarse, a partir das 12:00 horas. A saída situouse na rúa Víctor Velasco e a meta instalouse no Campo da Feira.