Cambre pide á Xunta que adscriba aos centros educativos da zona a Escola Unitaria de Pravio
O Concello de Cambre consolidou o seu apoio incondicional á Escola Unitaria de Pravio a través da aprobación no pleno municipal por unanimidade da moción presentada por Unión por Cambre e o PSOE.
En primeiro lugar, solicítase á Xunta de Galicia a adscrición da Unitaria aos Centros Educativos de Educación Primaria próximos ás instalacións: o CEIP Emilio González López, o Gonzalo Torrente Ballester e o CEIP Juana de Vega de Nós que, a pesar de estar situado no Concello de Oleiros, atópase a 4 quilómetros da unitaria.
Doutra banda, tamén se insta á Xunta á contratación de dous docentes na aula para, deste xeito, garantir a supervivencia da escola, xa que coa aplicación do cambio de cocientes por parte da entidade autonómica precisaríanse destas figuras para poder manter as 20 prazas actuais.
A pesar de ser un centro de ensino rural, continúa gozando dunha alta demanda e nos últimos anos tiveron que realizarse baremacións para poder atender o alto número de demandas recibidas.
Esta moción foi presentada co obxectivo de reverter a situación e contribuír á supervivencia da Unitaria, que é unha fonte de valor para o sistema educativo municipal.