Cambre leva ao pleno un pago urxente de máis de medio millón de euros
Este luns 26 de decembro, o goberno de Cambre levará ao pleno un Recoñecemento Extraxudicial de Crédito (REC) que inclúe facturas por un total de 524.377,67 euros. A medida, que se presenta como moción urxente, ten como obxectivo asegurar o pago de servizos esenciais como o abastecemento de auga, a limpeza viaria, o mantemento de zonas verdes e a limpeza de instalacións municipais, mentres non se formalizan os contratos pendentes.
Entre as facturas que se debaterán destacan as da empresa encargada da subministración de auga e rede de sumidoiros, así como as relativas á limpeza viaria, que representan o 73,8% do total. Estas compañías seguen operando baixo acordos plenarios e resolucións municipais que garanten a continuidade dos servizos esenciais.
A alcaldesa, María Pan, destacou a importancia de aprobar estes pagos: “Non pagar estas facturas supoñería un enriquecemento inxusto do concello á conta das empresas. Aínda que sabemos que a solución pasa por adxudicar os contratos, debemos garantir os servizos básicos mentres tanto”.
Así mesmo, Pan pediu responsabilidade a todos os grupos políticos: “Non podemos deixar que as empresas sufran consecuencias económicas que tamén afectarían a traballadores, familias e veciños. Hoxe, este REC é a única vía para seguir adiante, e priorizar o interese xeral é a nosa obrigación como representantes públicos”.