Cambre destinará máis de 700.000 euros a realizar melloras na Barcala
O pleno do Concello de Cambre aprobou este xoves, 29 de agosto, destinar a segunda fase do Pos + Adicional 2/2024 a dúas obras centradas na mellora da seguridade peonil e a accesibilidade na zona de A Barcala. O investimento total ascende a 702.407,83 euros, que se destinarán a proxectos que buscan mellorar a conectividade e eliminar os déficits urbanos, facilitando o uso dos espazos públicos para todos os veciños e veciñas.
Esta proposta contou cos votos favorables de Unión x Cambre, PP, PSOE e Alternativa dos Veciños, mentres que o BNG optou pola abstención.
O primeiro proxecto inclúe a pavimentación de beirarrúas na mazá M-3 de A Barcala, nas rúas Río Mero, Río Miño, Río Mandeo, e na praza Amador e Daniel. Esta intervención busca mellorar tanto a accesibilidade como a seguridade na zona, ademais de resolver problemas de humidades nos rochos dos edificios. Tamén se instalarán sistemas de recollida de augas pluviais, novo equipamento urbano (como alcorques, vexetación, bancos e papeleiras), e barandas que se adapten á normativa actual.
O segundo proxecto contempla a mellora da accesibilidade na praza Casares Quiroga, co obxectivo de garantir o acceso sen discriminación a este espazo público e evitar as humidades nos rochos da edificación. Para iso, demoleranse as beirarrúas existentes e renovaranse con pavimento de formigón, mellorando o aspecto e a funcionalidade do espazo.
O concelleiro de Urbanismo, Obras e Servizos, Juan González Leirós, destacou que estas actuacións son "fundamentais para continuar coas melloras de accesibilidade no noso termo municipal e evitar que sigan existindo barreiras que supoñen unha discriminación no acceso e uso de determinados lugares públicos".
Ademais, durante a sesión, aprobáronse os festivos locais para 2025. Inicialmente, propuxéronse o martes de Entroido, 4 de marzo, e o día de San Roque, 16 de agosto. Con todo, tras unha moción de urxencia presentada polo BNG, acordouse que os festivos locais serán o martes de Entroido, 4 de marzo, e o día de San Xoán, 24 de xuño. A moción foi aprobada cos votos a favor do BNG, PSOE e PP, e os votos en contra de UxC e Alternativa dos Veciños.