Brexo-Lema en Cambre celebra esta fin de semana a festa en honra á Nosa Señora dos Dolores
O lugar de Brexo-Lema, na parroquia de Brexo, pertencente ao municipio de Cambre, celebrará esta fin de semana as festas en honra á Nosa Señora dos Dolores. Os festexos darán comezo o venres 20 de setembro, a partir das 20.00 horas, cunha gran paellada e churrascada para os asistentes. A xornada culminará cunha animada verbena a cargo da orquestra Marbella e a discomóbil CDC. Ademais, durante a noite, sortearanse 300 euros entre os participantes.
O sábado 21, as festividades comezarán ás 09.00 horas coas tradicionais dianas e alboradas, e ás 14.00 horas dará inicio a sesión vermú, amenizada polo dúo D'Luxe. Pola tarde, a partir das 17.30 horas, haberá paseos a cabalo na Finca Abrigosa e inchables gratuítos para os máis pequenos. Ás 18.00 horas, disputarase o clásico partido de fútbol entre solteiros e casados, seguido dun bochinche musical a partir das 19.00 horas. A xornada nocturna contará coa verbena a cargo do grupo Unión y Fuerza e o dúo D'Luxe.
O domingo 22 será o día grande coa II Concentración de Coches e Motos Clásicas, que se celebrará ás 13.00 horas. Ás 13.30 horas oficiarase a misa solemne en honra á Nosa Señora dos Dolores, tras a cal terá lugar unha nova sesión vermú no campo da festa, amenizada por Begoña García.