BNG e PP piden diálogo entre o Deportivo e o Concello da Coruña
A crecente tensión entre o Concello da Coruña e o Deportivo xerou reaccións entre os principais grupos da oposición municipal. Tanto o BNG como o PP coinciden na necesidade de abrir canles de diálogo e cooperación entre ambas entidades para evitar que a situación prexudique á cidade e ao deportivismo.
O portavoz do BNG, Francisco Jorquera, lamentou os constantes desencontros entre o goberno local e o club herculino, e apelou a “sentarse a falar, dialogar e actuar con vocación de cooperar”. Ademais, criticou a falta de transparencia por parte do executivo que lidera Inés Rey, especialmente no relativo aos plans de reforma do estadio de Riazor de cara ao Mundial 2030. “Seguimos sen saber prazos, custos nin quen será o operador privado implicado”, sinalou.
Pola súa banda, o portavoz do PP, Miguel Lorenzo, tamén reclamou “calma e diálogo” e criticou as formas do goberno municipal. “Se eu fose alcalde, collería o teléfono para falar de ti a ti e buscar solucións”, afirmou. Lorenzo denunciou unha falta de transparencia que, segundo el, tamén perciben outros colectivos veciñais como os das Casas de Franco ou A Sardiñeira.
Ambos grupos coinciden en que a confrontación non beneficia nin ao Deportivo nin á cidade, e advirten de que a xestión do Concello necesita maior diálogo e claridade nas súas decisións. Tamén lembran que o estadio de Riazor é de titularidade municipal e que o club forma parte do patrimonio emocional da Coruña, polo que instan a resolver as diferenzas con responsabilidade institucional.