Betanzos reforza o apoio ás familias vulnerables con axudas para o pago da vivenda
O Concello de Betanzos aprobou en Pleno destinar 70.000 euros do POS social ao programa de axudas para o pago da vivenda habitual, unha iniciativa dirixida tanto a persoas con alugueiro como con préstamo hipotecario. Este plan ten como obxectivo principal reducir o impacto económico e social nas familias máis vulnerables do municipio.
As axudas, que forman parte do Plan Provincial POS+ADICIONAL impulsado polo Concello en colaboración coa Deputación, estarán dispoñibles para aquelas persoas titulares dun contrato de alugueiro ou dunha hipoteca cuxa vivenda constitúa a súa residencia habitual. Os solicitantes deberán estar empadroados na vivenda cunha antigüidade mínima de seis meses e acreditar unha situación de vulnerabilidade económica. Esta vulnerabilidade considerarase cando os ingresos da unidade de convivencia non superen os límites establecidos nas bases da convocatoria.
O programa de axudas, iniciado durante a crise derivada da pandemia da Covid-19, demostrou ser un recurso esencial para moitas familias e mantense como unha prioridade nas políticas sociais do Concello. Entre os colectivos que se beneficiarán de forma prioritaria atópanse as familias numerosas, monoparentais, acolledoras, vítimas de violencia de xénero ou aquelas con persoas maiores ou con discapacidade ao seu cargo.
Deste xeito, o Concello de Betanzos reforza o seu compromiso co benestar da cidadanía e co apoio ás familias que atravesan dificultades económicas, garantindo un acceso máis sostible á vivenda no municipio.