Betanzos impulsa a creación dos primeiros hortos urbanos en Bellavista para fomentar o autoconsumo e a participación cidadá
O Concello de Betanzos prepara o proxecto para crear os seus primeiros hortos urbanos na zona de Bellavista, unha iniciativa que estará en marcha nos primeiros meses do próximo ano. As obras de acondicionamento do espazo sairán a licitación esta semana, transformando unha área que anteriormente se utilizaba como invernadoiro municipal e punto de almacenamento de restos de obras.
A ubicación elixida, próxima ao casco urbano, responde a unha demanda veciñal de ter espazos para o cultivo, especialmente para aqueles que residen na cidade e non dispoñen de terreos propios. O proxecto busca promover prácticas de agricultura sostible, fomentar o autoconsumo e recuperar tradicións agrícolas, ademais de favorecer a xestión comunitaria dos hortos e potenciar a interacción entre xeracións.
O funcionamento dos hortos estará regulado a través dun regulamento específico que establecerá as normas de uso e as obrigas dos beneficiarios das parcelas. O proxecto, que conta coa colaboración da Deputación Provincial, inclúe a creación de 68 hortos divididos por camiños peonís, cunha zona común de compostaxe e instalacións para a rega.
Os hortos estarán destinados ao cultivo ecolóxico, combinando produción para autoconsumo con finalidades sociais e ambientais, cun grande potencial para a participación cidadá. Con esta iniciativa, o Concello pretende rexenerar un espazo degradado e ofrecer aos veciños a oportunidade de ter un horto próximo ás súas vivendas.