Betanzos enche o casco histórico de música tradicional coa segunda edición de Cantos de Taberna
Betanzos celebrará este sábado 20 de xuño a segunda edición de Cantos de Taberna, unha proposta que volverá converter o casco histórico nun escenario aberto para a música tradicional galega.
A cita desenvolverase entre as 19.30 e as 22.30 horas, con actuacións itinerantes por diferentes bares e tabernas da cidade. En total participarán nove agrupacións: A Fuliada, Parabéns, Amarabela, Grupo Azougue, Dolaodosol, Foliada de Remior, Vireda da Cela, Viute o Demo, Brañas de Andrés e Nubeiro.
Os grupos pasarán por locais como Capitol Lolo, Lusco e Fusco, Soportal 25, Taberna Breogán, Ternera Grill, O Candil, A Tasca, Adega do Pino O Globo, O Bacel, Travesía Vinos, Kutako, Bar Galicia, Cafetería Plaza, Casa Carmen, Café de Segundo, Yocri, Pulpeira Pirri, Nueva Internacional, Triveca, Café Banca, A de Pedro, Zojo e Comer y Picar Vega.
A programación incluirá tamén unha mostra de artesanía centrada nos instrumentos tradicionais galegos, coa presenza de nove artesáns. O público poderá coñecer de preto o traballo de profesionais especializados na elaboración e conservación de pezas vinculadas á música popular.
A xornada pecharase ás 22.30 horas cunha gran foliada libre na praza García Naveira, aberta á participación da veciñanza e visitantes. A iniciativa busca difundir a música tradicional, dinamizar a hostalaría local e crear un ambiente festivo arredor da cultura galega.