Besteiro reivindica o acordo UE-Mercosur como unha oportunidade para a industria e o emprego en Galicia
O secretario xeral do PSdeG, José Ramón Gómez Besteiro, reivindicou este xoves en Oleiros o acordo entre a Unión Europea e Mercosur como unha oportunidade estratéxica para fortalecer a economía galega, ampliar mercados para as empresas da comunidade e favorecer a creación de emprego. A intervención produciuse durante un encontro organizado polo corpo consular de varios países latinoamericanos, no que se analizaron os principais desafíos económicos, sociais e demográficos de Galicia desde unha perspectiva internacional.
Durante a reunión tamén se abordaron cuestións como o impacto dos aranceis impulsados por Donald Trump sobre as exportacións galegas, que superan os 800 millóns de euros anuais cara ao mercado estadounidense, así como os efectos da Lei de Memoria Democrática. Segundo se expuxo no encontro, máis de 2,4 millóns de descendentes de emigrantes españois solicitaron a nacionalidade ao abeiro desta normativa, especialmente en países como Arxentina, Cuba, Venezuela, México e Uruguai.
Besteiro destacou a histórica relación entre Galicia e América Latina, construída ao longo de décadas de emigración. Neste sentido, lembrou que a diáspora galega suma actualmente máis de 563.000 persoas rexistradas no exterior e arredor de 505.000 inscritas no censo electoral. Ao seu xuízo, esta conexión transcende o plano emocional e cultural para converterse tamén nun activo económico de gran valor, especialmente nun momento no que países como Brasil e Arxentina gañan relevancia como destinos das exportacións galegas.
Outro dos asuntos centrais do encontro foi o reto demográfico. O máximo responsable dos socialistas galegos defendeu os procesos de regularización de inmigrantes promovidos polo Goberno de España como unha ferramenta necesaria para responder á falta de traballadores en sectores que presentan dificultades para cubrir vacantes, entre eles os coidados, a hostalaría, a construción e o sector primario. "Regularizar é dar dereitos, pero tamén actuar con realismo e responsabilidade", sostivo durante a súa intervención.
O dirixente socialista concluíu a súa participación apostando por un modelo de reindustrialización sustentado na innovación, a transición enerxética e a creación de emprego de calidade, ao tempo que reiterou a importancia de fortalecer os vínculos económicos entre Galicia e América Latina para afrontar os retos de futuro.