Bergondo reúne fiscais de toda España para reforzar a protección das vítimas
O Pazo de Mariñán, en Bergondo, converteuse esta semana no principal punto de encontro do Ministerio Fiscal para reflexionar sobre a protección das vítimas no proceso penal. A Escola de Verán chega á súa 28 edición cun programa que reúne durante tres días fiscais, especialistas e representantes de diferentes institucións procedentes de toda España.
A fiscal superior de Galicia, Carmen Eiró, abriu este mércores as xornadas, organizadas pola Fiscalía Xeral do Estado e o Centro de Estudos Xurídicos, coa colaboración da Xunta de Galicia e da Deputación da Coruña. No acto inaugural tamén participaron representantes da Fiscalía, das administracións e do Concello de Bergondo.
A edición deste ano pon o foco na necesidade de situar as vítimas no centro do sistema xudicial. As sesións analizarán como ofrecer unha atención máis próxima e especializada, garantir os seus dereitos e evitar que as persoas afectadas teñan que revivir innecesariamente experiencias traumáticas durante os procedementos.
Entre os asuntos incluídos no programa figuran a evolución do tratamento das vítimas no proceso penal, a dispensa de declarar, a proba preconstituída e as garantías previas aos acordos de conformidade. Tamén se abordará a protección das vítimas de violencia sexual e de xénero e as novas competencias das seccións de Violencia sobre a Muller.
A atención aos menores ocupará unha parte destacada das xornadas. Os participantes estudarán o modelo Barnahus, que busca concentrar nun mesmo espazo a atención xudicial, psicolóxica, sanitaria e social dos nenos e nenas vítimas de abusos sexuais, reducindo o número de declaracións e intervencións ás que deben someterse.
O programa inclúe ademais mesas sobre persoas maiores, persoas con discapacidade, migrantes, vítimas de trata e de delitos de odio. Outra das sesións estará dedicada á resposta institucional e xurídica ante grandes catástrofes ou sucesos con múltiples vítimas.
A Escola de Verán rematará este venres coa participación da fiscal xeral do Estado, Teresa Peramato. O encontro busca reforzar a coordinación entre profesionais e avanzar cara a unha xustiza que, ademais de aplicar a lei, acompañe ás vítimas e lles permita participar no proceso con dignidade e seguridade.