Bergondo estrea ‘Serán Mozo’, un programa de ocio para a mocidade
O Concello de Bergondo pon en marcha este venres, 20 de decembro, ‘Serán Mozo’, un programa de actividades dirixido á mocidade a partir dos 12 anos. Esta iniciativa busca ofrecer alternativas de lecer e tempo libre durante as tardes dos venres e sábados, adaptándose aos intereses deste grupo de idade e proporcionándolles un espazo de encontro.
As actividades desenvolveranse na Casa da Mocidade de San Cidre, situada detrás da Casa do Concello e ao carón da pista de fútbol sala cuberta, en horario de 17:00 a 21:00 horas. A entrada é de balde.
‘Serán Mozo’ inclúe un amplo abano de propostas como obradoiros creativos, xogos de mesa, futbolín, actividades deportivas e videoxogos, entre outras. O programa non só busca entreter, senón tamén fomentar o desenvolvemento persoal e social da mocidade nun ambiente seguro e educativo.
Desde o goberno local subliñan a relevancia desta iniciativa, destacando que “queremos que a mocidade de Bergondo teña un espazo onde poida divertirse, aprender e relacionarse nun ambiente seguro. Serán Mozo é a nosa aposta por un lecer saudable e enriquecedor”.