Infraestructuras

O Concello financiará xunto coa Igrexa un proxecto de 110.000 euros para estabilizar o terreo e eliminar as filtracións de auga que ameazan os panteóns

O Concello de Bergondo levará ao pleno ordinario deste xoves a aprobación dun suplemento de crédito que inclúe unha subvención nominativa de 55.000 euros á Igrexa para financiar as obras de emerxencia que permitan solucionar os graves problemas estruturais detectados no cemiterio parroquial de Cortiñán.

A achega municipal servirá para sufragar de forma conxunta un proxecto valorado en 110.000 euros, que contempla traballos de drenaxe e estabilización do terreo para frear os afundimentos rexistrados en distintos puntos do camposanto.

En abril de 2025, o Concello xa reclamara unha actuación urxente no cemiterio tras detectarse desprendementos de formigón e a aparición dun socavón que facía temer un problema estrutural de maior alcance.

O acordo chega despois de analizar o informe técnico encargado polo Concello para coñecer o estado real do subsolo do recinto. O estudo conclúe que a solución máis viable pasa por executar unha actuación sobre o sistema de drenaxe, a pesar de que o cemiterio non sexa de titularidade municipal.

Desde o goberno local lembran que o camposanto de Cortiñán é o único da parroquia e que a construción dun novo suporía uns prazos moi longos. Por este motivo, o Concello optou por colaborar economicamente coa Igrexa para garantir a conservación do recinto por razóns de interese público.

Os problemas comezaron a facerse visibles en maio de 2024, cando apareceron danos estruturais e colapsos na cuberta de varios nichos da última ampliación. Posteriormente xurdiron novos socavóns e afundimentos no terreo, ata o punto de obrigar ao peche de parte do cemiterio por motivos de seguridade.

Segundo o informe técnico contratado polo Concello, a principal causa dos afundimentos é a existencia dun fluxo de auga subterránea procedente dunha leira situada nunha cota superior, unido ás filtracións no sistema de recollida de augas pluviais.

Para corrixir definitivamente o problema, o proxecto contempla eliminar ese fluxo de auga mediante a reparación ou supresión da tubaxe que abastece a fonte do cemiterio, a construción dunha gabia de drenaxe profunda xunto ao peche exterior e a instalación de novas liñas de drenaxe superficial para evitar acumulacións de auga baixo os panteóns.

Ademais, estabilizarase o terreo mediante a inxección de columnas de morteiro baixo as cimentacións dos nichos e a substitución do recheo existente nas zonas máis afectadas por materiais con maior capacidade portante.

Tras as reunións mantidas entre ambas as dúas institucións, será a Igrexa a encargada de redactar o proxecto construtivo, mentres que o Concello materializará a súa colaboración económica mediante a subvención que se someterá á aprobación do pleno.

Desde o goberno local destacan que este acordo enmárcase nunha nova liña de colaboración coa Igrexa para recuperar espazos de interese para o municipio. Neste sentido, lembran a recente adquisición da reitoral de Guísamo e os traballos previstos para mellorar a contorna da igrexa de Santa Marta.