Bens e San Cristovo das Viñas encheranse de ambiente festivo cunha fin de semana de música e tradición
A Coruña vivirá esta fin de semana dúas das súas citas festivas máis destacadas coa celebración das Festas de Bens e da Festa dos Martelos, en San Cristovo das Viñas. Ambas as celebracións forman parte do programa municipal de apoio ás festas dos barrios e volverán converter as rúas en espazos de encontro, convivencia e lecer grazas ao traballo das entidades veciñais coa colaboración do Concello.
As Festas de Bens desenvolveranse entre o venres 3 e o domingo 5 de xullo cunha programación deseñada para todos os públicos. A apertura terá lugar o venres cunha churrascada popular, seguida dunha verbena amenizada pola orquestra Los Satélites.
A actividade continuará o sábado cunha sesión vermú a cargo do Dúo Crazy, acompañada dunha nova proposta gastronómica e dunha verbena nocturna protagonizada por Fania Blanco Show.
A xornada do domingo estará marcada polas actividades máis tradicionais, con dianas e alboradas, un partido de fútbol entre veciños, misa solemne, sesión vermú con degustación de polbo e actuación musical, ademais dunha festa infantil, un torneo de chave e música para despedir os festexos.
Paralelamente, a praza Agustín Díaz acollerá entre o 2 e o 4 de xullo unha nova edición da Festa dos Martelos, organizada pola Asociación Veciñal de San Cristovo das Viñas e Monte Martelo. A programación arrancará o xoves co pregón inaugural e diversas actuacións musicais que darán comezo a tres días de celebración.
O venres converterase nunha das citas centrais coa actuación da banda América de Vigo, mentres que o sábado concentrará boa parte das actividades previstas. Entre elas figuran a bendición de vehículos, unha churrascada popular, animación musical durante toda a xornada e unha verbena coa orquestra Barceló. O programa completarase con xogos, sorteos e distintas propostas de lecer pensadas para persoas de todas as idades.
Estas dúas celebracións forman parte do programa Festas nos Barrios, impulsado polo Concello da Coruña para fortalecer o movemento veciñal e apoiar a organización de actividades culturais e sociais nos distintos barrios da cidade. O Goberno municipal mantén un sistema de subvencións destinado ás asociacións veciñais para favorecer a celebración destes eventos.
O concelleiro de Cultura e Turismo, Gonzalo Castro, destacou que estas festas reflicten a capacidade dos barrios para crear espazos de participación, convivencia e promoción da cultura popular, contribuíndo ao fortalecemento da identidade veciñal e convertendo Bens e San Cristovo das Viñas en puntos de encontro tanto para a cidadanía como para os visitantes.