Autobuses gratuítos levarán á Coruña ás mulleres de Curtis citadas para o cribado de mama
As mulleres de Curtis e Teixeiro citadas este mes para participar no programa de cribado de cancro de mama poderán desprazarse de balde ata A Coruña en autobuses habilitados pola Xunta. A medida busca facilitar a asistencia ás revisións, dirixidas a pacientes de entre 50 e 74 anos, que se realizan nas unidades de exploración do Hospital Abente y Lago.
O Sergas comezou este martes, 5 de maio, a enviar as citacións ás mulleres ás que lles corresponde esta revisión, que se leva a cabo con carácter periódico, habitualmente cada dous anos. No caso de Curtis, as probas están previstas para os días 21 e 29 de maio.
Para esas xornadas estableceranse varios puntos e horarios de saída. Os autobuses partirán da praza do Concello en Teixeiro ás 8.00 e ás 11.30 horas; da oficina municipal do recinto feiral de Curtis ás 8.15 e ás 11.45 horas; e da Casa da Xuventude de Curtis ás 8.20 e ás 11.50 horas.
A organización do regreso realizarase unha vez rematadas as mamografías no hospital coruñés, co obxectivo de adaptar a volta ao desenvolvemento das exploracións.
O transporte gratuíto tamén se ofrecerá ás mulleres de Sobrado citadas para os días 18 e 20 de maio, con saídas desde a praza do Concello de Sobrado dos Monxes e desde As Cruces.