Aspronaga reúne en Oleiros a centos de persoas na súa tradicional Festa das Familias
As instalacións de Aspronaga en Lamastelle, no concello de Oleiros, acolleron este venres unha nova edición da Festa das Familias, unha das citas máis emblemáticas da entidade, que reuniu a persoas usuarias, familiares, profesionais, voluntariado e representantes institucionais nunha xornada de convivencia e encontro.
Entre as asistentes estivo a deputada de Política Social da Deputación da Coruña, Mar García Vidal, quen puxo en valor o traballo que Aspronaga desenvolve desde hai máis de seis décadas a favor das persoas con discapacidade intelectual e das súas familias.
Durante a súa intervención, a deputada destacou a importancia do labor diario que realiza a entidade en ámbitos como a atención especializada, a promoción da autonomía persoal, a inclusión social, a formación e a mellora da calidade de vida das persoas usuarias.
García Vidal sinalou que organizacións como Aspronaga desempeñan un papel fundamental ao acompañar ás persoas e ás súas familias desde a proximidade e cun compromiso continuado, converténdose nun apoio esencial ao longo das distintas etapas da vida.
A Festa das Familias serviu tamén para recoñecer a implicación do persoal técnico, das persoas voluntarias e das propias familias, consideradas unha peza clave no funcionamento diario da entidade e no desenvolvemento dos seus proxectos.
A deputada provincial destacou ademais a necesidade de seguir fortalecendo a colaboración entre as administracións públicas e o tecido asociativo para avanzar cara a un modelo de atención cada vez máis próximo, inclusivo e adaptado ás necesidades reais das persoas.
A xornada desenvolveuse nun ambiente festivo e de convivencia, consolidando unha vez máis esta celebración como un espazo de encontro para as familias vinculadas a Aspronaga e para todas as persoas que colaboran coa entidade no seu labor de inclusión social.