Aspace adianta a Nadal ao 6 de outubro para reclamar máis apoios ás familias de persoas con parálise cerebral
A Confederación Aspace adiantará simbolicamente o Nadal ao próximo 6 de outubro, coincidindo co Día Mundial da Parálise Cerebral, para poñer o foco na realidade que viven miles de familias que necesitan organizar a súa vida arredor dos coidados. A iniciativa forma parte da campaña #CuidarSinRenunciar, coa que a entidade reclama máis apoios para que coidar non implique renunciar ao traballo, ao tempo libre ou ao propio proxecto vital.
A elección do Nadal como elemento da campaña busca representar precisamente esa anticipación constante. As familias de persoas con parálise cerebral e grandes necesidades de apoio deben prever tratamentos, organizar recursos, coordinar horarios e planificar os coidados para responder ás necesidades do día a día.
Baixo o lema 'O mellor agasallo é coidar sen renunciar', a Confederación Aspace reclama que esta responsabilidade sexa compartida entre as familias, as administracións públicas e o conxunto da sociedade. A organización considera que as persoas con parálise cerebral teñen dereito a desenvolver o seu propio proxecto de vida e que as súas familias tamén deben poder facelo.
Segundo os datos do Movemento Aspace, en España viven arredor de 120.000 persoas con parálise cerebral e o 80 % presenta grandes necesidades de apoio. Ademais, existen 912.054 persoas con discapacidades afíns á parálise cerebral, que tamén poden afrontar importantes barreiras para a participación e necesitar apoios específicos.
O peso dos coidados recae principalmente nas mulleres
A campaña pon especial atención na situación das persoas que coidan dentro das propias familias. Son elas, en moitos casos, as que organizan tratamentos, coordinan recursos, realizan tarefas de coidado persoal e acompañan os seus familiares nas actividades cotiás.
Esta realidade ten consecuencias na vida laboral e persoal. Segundo os datos achegados pola Confederación Aspace, o 71,5 % das persoas coidadoras familiares son mulleres. Moitas delas reducen a súa xornada laboral ou abandonan o mercado de traballo para poder atender as necesidades dos seus familiares.
A carga tamén se traslada á economía doméstica. A entidade calcula que o sobrecusto asociado ás grandes necesidades de apoio pode situarse entre 250 e 890 euros semanais, unha cantidade que pode manterse durante toda a vida.
Máis recursos e apoio ás familias
Con esta campaña, o Movemento Aspace reclama un sistema público de apoios especializado, estable e suficiente. Entre as súas propostas figura ampliar a Atención Temperá ata a maioría de idade, reforzar os recursos residenciais e os apoios comunitarios e aumentar os servizos de respiro familiar.
Tamén pide medidas de conciliación adaptadas ás necesidades destas familias, atención psicolóxica e unha financiación suficiente para garantir os apoios especializados durante as distintas etapas da vida.
A Confederación Aspace pretende que o 6 de outubro sirva así para trasladar á sociedade unha mensaxe concreta: os coidados non poden depender exclusivamente do esforzo das familias, senón que necesitan unha resposta estable por parte das administracións e do conxunto da sociedade.