As panxoliñas volven encher de música o Palco dos Xardíns de Méndez Núñez este Nadal
O Concello da Coruña recupera este Nadal as tradicionais panxoliñas no Palco da Música dos Xardíns de Méndez Núñez. A partir deste mércores 11 e ata o sábado 21 de decembro, diferentes agrupacións musicais actuarán en sesións de 19.00 a 19.30 e de 20.00 a 20.30 horas, enchendo de música este espazo emblemático.
O concelleiro de Cultura e Turismo, Gonzalo Castro, destacou que esta iniciativa busca poñer en valor o tecido cultural local e promover a música propia destas datas nun contorno máxico. “Este espazo, ademais, contará durante o Nadal con atraccións e actividades para todas as idades”, indicou.
Entre as agrupacións participantes atópanse a Coral Breogán, a Polifónica Coruñesa Canticorum, a Asociación de Coros e Danzas Eidos e a Asociación Cultural Pandereteiras Sen Fronteiras, entre outras. Ademais, o sábado 14 de decembro, ás 17.00 horas, terá lugar unha ruta musicalizada entre o Obelisco e o Teatro Rosalía de Castro, a cargo da Agrupación Musical Emilia Pardo Bazán e a Asociación Costumes.
Outra novidade deste Nadal é a primeira Feira Artesá de Nadal, que terá lugar do 20 de decembro ao 5 de xaneiro nos Xardíns de Méndez Núñez. Esta feira ofrecerá propostas de artesanía inspiradas nas festas.
As panxoliñas e as actividades previstas converterán os Xardíns de Méndez Núñez nun dos epicentros das celebracións do Nadal na Coruña.