As obras do paseo da ría no Graxal e no Paraíso encaran a súa fase final
As obras do paseo da ría no Graxal e no Paraíso encaran a súa fase final. O novo tramo de paseo entre Oleiros e Cambre xa está rematado, á espera dos últimos detalles e das actuacións de xardinería no seu entorno.
Nas próximas semanas tamén está previsto que conclúan os traballos correspondentes ao tramo do Paraíso, o que permitirá completar un percorrido que fará posible circunvalar toda a ría polos municipios de Oleiros, Cambre e Culleredo ata A Coruña.
O alcalde de Oleiros, Ángel García Seoane, destacou o traballo realizado polo Concello para conseguir que estes dous tramos pendentes se convertesen finalmente nunha realidade. "Todo o mundo sabe que houbo unha guerra total por parte do Concello de Oleiros para lograr que esta obra fose unha realidade", afirmou.
Segundo explicou, tras as obras de dragado estes dous tramos quedaran sen executar, polo que a administración local impulsou a súa realización. García Seoane asegurou que a actuación "ademais está quedando marabillosamente ben".
No caso do Paraíso, está previsto que as obras rematen ao longo do mes de setembro. Mentres continúan os traballos, o Concello de Oleiros fai un chamamento á cidadanía para que respecte as zonas delimitadas e non acceda aos espazos acoutados, co obxectivo de evitar retrasos nas labores de xardinería.