As novas paradas do autobús urbano no Obelisco comezarán a funcionar este luns
As novas paradas do transporte urbano situadas no Obelisco e no Copacabana entrarán en servizo este luns, 20 de xullo, nun novo paso dentro das obras de remodelación dos Cantóns impulsadas polo Concello da Coruña.
A posta en funcionamento destas dúas paradas permitirá anular de forma provisional as actuais situadas no Cantón Pequeno e na praza de Mina, facilitando así o avance dos traballos nesta zona. Unha vez rematada a remodelación, as paradas recuperarán a súa actividade.
Durante este período, as novas paradas do Obelisco e do Copacabana concentrarán o tránsito das persoas usuarias que empregan o autobús urbano nos Cantóns como punto de saída ou chegada.
As obras avanzan tamén noutros puntos da actuación. Nos últimos días iniciouse o pavimentado do novo carril bici que bordea os xardíns de Méndez Núñez e colocouse a capa de rodadura nos carrís destinados ao tráfico rodado.
Ademais, continúan os traballos para construír a nova saída do aparcadoiro subterráneo e o futuro ascensor que conectará a superficie co estacionamento, situado fronte á sede da Fundación Barrié. Esta nova infraestrutura mellorará a accesibilidade para persoas con mobilidade reducida e facilitará tamén o acceso con carriños infantís.
Segundo lembrou a alcaldesa, Inés Rey, as actuacións avanzan conforme aos prazos previstos e permitirán crear uns Cantóns con máis espazos verdes, menos superficie destinada ao tráfico e unha maior accesibilidade.