'As letras moradas' achega o feminismo á Biblioteca Municipal cun encontro con dúas autoras
A Biblioteca Pública Municipal de Irixoa acollerá o xoves 5 de marzo, ás 11.00 horas, unha nova proposta do ciclo Perspectivas Literarias, impulsado pola Biblioteca da Deputación da Coruña. A sesión leva por título 'As letras moradas. Un achegamento literario sobre o feminismo' e contará coa presenza das autoras Lidya Chas e María Nieto.
O Concello explica que a actividade busca abrir un espazo de reflexión arredor do feminismo a través da literatura, nun formato pensado para achegar ao público diferentes miradas e lecturas sobre a igualdade. O encontro desenvolverase nas instalacións da biblioteca municipal, situada na rúa Pazo de Irixoa, 14.
Con esta convocatoria, Irixoa suma unha nova cita cultural centrada no pensamento e na creación literaria, coa intención de conectar á veciñanza con propostas que poñen o foco nos debates sociais do presente.