As 'Lacónicas' volven á Coruña con 33 establecementos e menús especiais ata o 8 de marzo
A Coruña recupera este inverno unha das súas citas culinarias máis recoñecidas. O concelleiro de Turismo, Gonzalo Castro, presentou a undécima edición das 'Xornadas Gastronómicas do Lacón con Grelos', coñecidas popularmente como 'Lacónicas', que se celebrarán do 6 de febreiro ao 8 de marzo coa participación de 33 locais hostaleiros.
A posta de longo tivo lugar na Taberna de Cunqueiro e reuniu a responsables dalgúns dos restaurantes adheridos. Castro puxo en valor que estas xornadas “consolidan a boa sintonía entre a hostalaría e o público” e enmarcou a iniciativa na estratexia municipal para proxectar a imaxe da cidade a través da gastronomía local.
Durante catro semanas, os establecementos ofrecerán menús centrados nun dos pratos estrela da cociña galega, elaborados principalmente con produto de proximidade e de quilómetro cero. As propostas inclúen un primeiro prato (sopa ou similar), unha lacoada como principal e unha sobremesa tradicional (filloas e/ou orellas), con bebida e café de maneira opcional. Os prezos oscilarán entre os 25 e os 50 euros por persoa, e haberá locais que incorporan opción de recollida no establecemento ou mesmo envío a domicilio.
Os restaurantes participantes son: Restaurante La Marola (Hotel Zenit A Coruña), A Taberna de Cunqueiro, Restaurante Hünico, Galiur, Mahara Taberna Rock, Lois, Portela, Pío Pío Café Bar, Oliva, Federica Restaurante, Taberna O Freixo, La Tabarra, Marea Baja, La Cuchara Veggie, Asador Coruña, La Pérgola de Oído Cocina, Bodega Órdenes, Pesk-2, La.Con.Fusión, ACrunia, Restaurante ATTICA21, A Fuego Lento, El Invernadero, Ajetreo, A Sella Cervexería, Cosecha 81, O Muíño dos Leóns, Restaurante Bocalino, Restaurante Morriña, Gatopeixe, La Tribu, Con Dos Fogones e Bar Ciudad.