As infantís femininas do Salgado-Perillo proclámanse campioas galegas en remo olímpico
A canteira do Club de Regatas Salgado-Perillo volveu deixar boas sensacións na Liga Galega Xunta de Galicia de Remo Olímpico durante a xornada disputada esta fin de semana en Castrelo de Miño. A expedición regresou cun excelente resultado, marcado polo título conseguido polo equipo infantil feminino.
As mozas protagonizaron unha brillante actuación sobre a auga, que lles permitiu facerse coa medalla de ouro e proclamarse campioas da competición. O club destacou que este éxito é o reflexo do traballo desenvolvido ao longo de toda a tempada, así como do compromiso, a constancia e o espírito de equipo que caracteriza á canteira.
Pola súa banda, o conxunto infantil masculino tamén completou unha destacada participación. Aínda que nesta ocasión quedou ás portas do podio, os seus integrantes demostraron unha notable progresión e competiron con entrega durante toda a regata.
Desde o Club de Regatas Salgado-Perillo felicitaron a todos os deportistas polo esforzo realizado e puxeron en valor o traballo da base, que continúa levando o nome da entidade a un lugar destacado no remo galego.