As granxas de Ordes deixan atrás o confinamento pola gripe aviaria
As explotacións avícolas de Ordes recuperan desde este 16 de abril unha situación de maior normalidade tras o fin do confinamento obrigatorio das aves de curral, unha restrición que aínda seguía vixente no municipio mentres xa fora levantada noutras zonas do Estado a comezos de mes. A orde publicada este xoves no BOE deixa sen efecto a medida cautelar aprobada en novembro de 2025 para previr o contaxio por influenza aviaria.
O cambio ten especial relevancia no caso de Ordes porque era un dos municipios que continuaban sometidos á restrición despois da flexibilización parcial aplicada o 1 de abril. Aquela revisión deixara fóra do confinamento aos concellos non incluídos nos anexos II e III da orde estatal de protección, polo que a limitación seguía só nos humidais e nas áreas consideradas de maior risco.
No caso da provincia da Coruña, esa situación afectaba á contorna do encoro de Vilagudín. O anexo I da normativa estatal identifica este enclave como zona de especial risco en Galicia, e o anexo II mantén nese ámbito os municipios de Ordes, Cerceda e Tordoia. Iso explica que o levantamento aprobado este xoves teña unha lectura especialmente local nestes concellos, onde as explotacións aínda seguían condicionadas por esa medida.
A fin do confinamento non supón, en todo caso, baixar a garda. O Ministerio de Agricultura recomenda manter e reforzar as medidas de bioseguridade nas granxas para evitar o contacto con aves silvestres e pide comunicar aos servizos veterinarios oficiais calquera sospeita de enfermidade.
A decisión chega despois de varias semanas de evolución favorable da situación epidemiolóxica. O ministerio sostén que a ausencia recente de casos en aves silvestres e a mellora do escenario permitiron primeiro unha flexibilización parcial e agora o levantamento total da medida en toda España. Ademais, España mantén desde febreiro o status de país libre de influenza aviaria para efectos de comercio exterior.