As flores toman desde hoxe as rúas de Arteixo
A primavera entra de cheo nas rúas de Arteixo coa celebración da Festa das Flores, que comeza este luns 25 de maio e se prolongará ata o domingo 31. O municipio inicia así unha das súas citas máis agardadas, cun programa que mestura tradición, cultura popular, música, convivencia veciñal e propostas para diferentes idades.
A programación organizada polo Concello de Arteixo manterá algúns dos elementos máis representativos desta festa, como o Concurso de Maios, a elaboración da alfombra floral, a procesión con arcos florais e as actuacións musicais que acompañarán varias xornadas. As flores volverán ser o fío condutor dunha celebración moi ligada á identidade local e á chegada da primavera.
Durante toda a semana haberá actividades en diferentes espazos do municipio, entre eles o Centro Cívico Cultural de Arteixo 'Manuel Murguía', a Praza do Balneario, o Campo da Festa, o anfiteatro e a igrexa de Santiago de Arteixo. A programación incluirá tamén propostas vinculadas ao programa 'Cultiva o teu lecer', espectáculos familiares e verbenas.
A xornada grande chegará o domingo 31, coa misa solemne, a alfombra floral e a procesión. A Banda de Música Santiago de Arteixo acompañará un dos momentos máis simbólicos da festa, no que as rúas volverán encherse de cor e tradición arredor dos arcos florais.
A edición deste ano contará ademais con medidas de accesibilidade e sensibilización. Todos os días, entre as 18.30 e as 20.00 horas, as atraccións da feira funcionarán sen música para facilitar a participación de persoas con alta sensibilidade sensorial. Ademais, o venres e o sábado haberá un Punto Violeta no Campo da Festa baixo o lema 'Por un Arteixo libre de violencias machistas'.