As entidades culturais da provincia da Coruña poderán optar a 1,7 millóns en axudas da Deputación para 2027
A Deputación da Coruña vén de convocar dúas liñas de subvencións destinadas a entidades culturais sen ánimo de lucro da provincia para o ano 2027, cun orzamento conxunto de 1.725.000 euros. As convocatorias, publicadas este 12 de novembro no Boletín Oficial da Provincia (BOP), buscan apoiar o tecido asociativo e impulsar a actividade cultural nos municipios coruñeses.
A primeira liña conta cunha dotación de 1,2 millóns de euros para financiar proxectos e actividades culturais promovidos por entidades culturais, veciñais, pedagóxicas e asistenciais. As axudas oscilarán entre os 3.000 e os 30.000 euros por entidade.
Pola súa banda, a segunda convocatoria dispón de 525.000 euros para investimentos necesarios no desenvolvemento de proxectos culturais. Poderán solicitar estas achegas asociacións, entidades representativas do sector, fundacións e titulares de museos, centros de interpretación ou bibliotecas que teñan o domicilio fiscal na provincia da Coruña. Neste caso, as contías irán dos 3.000 aos 15.000 euros.
A deputada de Cultura, Natividade González, destacou a importancia destas convocatorias para apoiar o tecido asociativo e facilitar que as entidades locais dispoñan de recursos para manter e desenvolver a súa actividade cultural.
O prazo para presentar as solicitudes abrirase ás 08:00 horas do 20 de novembro de 2026 e permanecerá activo ata as 14:00 horas do 18 de decembro. A tramitación deberá realizarse obrigatoriamente por vía telemática a través da plataforma SUBTEL, accesible desde a sede electrónica da Deputación da Coruña.