As atraccións das Festas do Socorro de Carral, no aire tras un cambio de localización a poucas semanas das festas
As atraccións das Festas do Socorro de Carral están pendentes da situación provocada polo cambio de localización comunicado nas últimas semanas. A Comisión de Festas do Socorro difundiu un comunicado para aclarar os rumores que estaban circulando arredor da presenza destas instalacións durante a celebración, prevista do 3 ao 8 de setembro.
Segundo explica a comisión, a poucas semanas das festas o Concello decidiu trasladar as atraccións da súa localización habitual a unha finca situada na zona onde se queima o panteón.
Os feirantes consideran que ese novo emprazamento non é viable nin seguro debido ao desnivel, ao pouco espazo dispoñible e ás características do terreo, especialmente no caso de que se produzan condicións meteorolóxicas adversas. A Comisión de Festas sinala que, por este motivo, os feirantes decidiron non acudir ás festas.
A organización asegura ademais que tanto a propia comisión como os feirantes intentaron buscar outras alternativas e solucións ao cambio de localización proposto polo Concello, aínda que, segundo explican, esas opcións non foron tomadas en consideración.
Por agora, o Concello de Carral non se pronunciou publicamente sobre esta situación nin sobre as circunstancias que rodean o cambio de localización das atraccións.
A situación prodúcese a poucos días dunha das principais celebracións do calendario festivo de Carral. As Festas do Socorro desenvolveranse entre o 3 e o 8 de setembro e incluirán diferentes actividades ao longo de seis xornadas. Entre as citas previstas está tamén o Gran Premio de Carrilanas de Carral, que se celebrará o sábado 5 de setembro.
Pola súa banda, a Comisión de Festas asegura que continuará traballando para poder celebrar as Festas do Socorro coa mesma ilusión de sempre.