As asociacións de Culleredo implícanse na creación da Axenda Urbana do municipio
O Concello de Culleredo deu un paso máis na creación da súa Axenda Urbana ao reunir a unha trintena de representantes de asociacións locais para recoller as súas achegas e establecer as prioridades de actuación de cara ao 2030. O encontro, celebrado no Edificio de Servizos Múltiples de O Burgo, buscou fomentar a participación activa das entidades na configuración dun plan de desenvolvemento urbano que poida optar a fondos europeos.
O equipo redactor da Axenda Urbana coordinou a xornada, que comezou cunha exposición das liñas xerais do proxecto e continuou cunha serie de dinámicas participativas para identificar os intereses e retos principais do municipio. Esta estratexia, bautizada como 'CulleredoVivo Vive', dá continuidade ao proxecto anterior EDUSI (Estratexia de Desenvolvemento Urbano Sostible e Integrado) e centrarase en áreas clave como a eficiencia, a sustentabilidade, a competitividade e a inclusión.
Ademais de contar coas asociacións, o Concello tamén organizou encontros co grupo de goberno, a oposición e técnicos municipais para contrastar as análises realizadas en documentos de planificación existentes, como a EDUSI, o Plan de Mobilidade ou o PXOM.
“O obxectivo é deseñar un plan consensuado e realista, que responda ás necesidades e desafíos de Culleredo ata o 2030”, indicou o alcalde, José Ramón Rioboo. Tamén animou á cidadanía a participar no proceso a través dunha enquisa dispoñible na web municipal, permitindo que veciños e veciñas acheguen propostas enmarcadas nos Obxectivos de Desenvolvemento Sostible.
A Axenda Urbana de Culleredo pretende consolidar un modelo de desenvolvemento sostible baseado na rexeneración territorial e na conservación dos recursos naturais, valorando tanto o patrimonio ambiental como cultural do municipio.