Arteixo súmase á Rede Innpulso e busca gañar músculo innovador desde Madrid
Arteixo dá un paso máis na súa estratexia de innovación municipal coa súa incorporación á Rede Innpulso, o foro estatal que agrupa cidades recoñecidas polo seu impulso a políticas innovadoras. O alcalde, Carlos Calvelo, participa estes días en Madrid no pleno anual no que se avalía o traballo do último exercicio e se define a folla de ruta para 2026, nun encontro celebrado na sede do Ministerio de Ciencia, Innovación e Universidades.
A entrada de Arteixo na rede chega da man das 22 novas incorporacións deste ano, nun colectivo que suma xa 112 cidades de distintos tamaños. A distinción, segundo o Concello, valora o esforzo realizado en ámbitos como a mobilidade, o medio ambiente e a transformación dixital, e abre a porta a compartir experiencias con outras administracións locais e a colaborar en proxectos de I+D+i, tanto en programas nacionais como europeos.
Entre as liñas de traballo que promove a Rede Innpulso figuran a Compra Pública de Innovación, o apoio a pemes e emprendedores con perfil innovador, a creación de laboratorios urbanos e a participación en iniciativas vinculadas a Horizonte Europa. Para Arteixo, formar parte deste espazo supón tamén un trampolín para mellorar o acceso a fondos europeos e incorporar tecnoloxías que permitan reforzar os servizos públicos e os contidos TIC de carácter municipal.
O Concello pon exemplos do camiño percorrido nos últimos anos, como a mellora da mobilidade co transporte público municipal e o servizo de bicicletas, ou a aposta ambiental con infraestruturas como o centro de interpretación mariña Museo Mar de Sorrizo. “Valoramos moi positivamente entrar nunha rede que nos sitúa na primeira liña para acceder a solucións innovadoras e seguir mellorando os servizos á veciñanza”, sinalou Calvelo.