Arteixo súmase á loita contra a violencia machista cunha andaina
Arteixo volve mobilizarse na loita contra a violencia de xénero coa celebración da VI Andaina, que terá lugar o próximo 23 de novembro. A saída está programada ás 10:00 horas desde a cuberta do Campo da Festa, onde dará comezo un percorrido urbano de 4 quilómetros, apto para todos os públicos.
A xornada dará inicio ás 9:00 horas coa recepción das persoas participantes, seguida dunha sesión de zumba e a lectura dun manifesto. Ademais, ao finalizar a andaina, os asistentes poderán gozar dun chocolate con churros, todo isto amenizado pola música dun DJ.
O evento está presentado por Estíbaliz Veiga e as inscricións poden realizarse tanto de forma online como no CIM (Centro de Información ás Mulleres) ata o 22 de novembro ás 16:00 horas. As primeiras 350 persoas inscritas recibirán un chuviasqueiro como agasallo.
A VI Andaina contra a violencia de xénero é unha oportunidade para unir á cidadanía de Arteixo e visibilizar a importancia de erradicar esta lacra social.