Arteixo prorroga o plan estratéxico de subvencións e mobilizará case 3,9 millóns de euros en 2026
O pleno municipal de Arteixo aprobou a prórroga do seu plan estratéxico de subvencións, un documento marco que servirá de base para canalizar en 2026 preto de 3,9 millóns de euros en axudas dirixidas a proxectos sociais, educativos, culturais e deportivos. A proposta saíu adiante cos votos favorables do PP, BNG e da concelleira non adscrita Noelia Martínez, mentres que o PSOE optou pola abstención.
Segundo o Concello, o plan identifica como principais destinatarias as ANPAS e diferentes entidades e asociacións con fins sociais, ademais de colectivos culturais e clubs deportivos. Entre as liñas de apoio figuran tamén as bolsas comedor e outras actuacións vinculadas ao benestar, como a reserva de prazas para veciños e veciñas de Arteixo na residencia de maiores mediante convenio.
O plan actúa como documento de referencia para que, ao longo do ano, o Concello poida ir convocando subvencións en ámbitos clave como a promoción económica (creación de empresas e emprego), cultura, deporte (atletas e entidades), igualdade e loita contra a violencia de xénero, así como servizos sociais (ONGs). Unha vez abertas as convocatorias, serán as entidades e persoas interesadas as que teñan que solicitar as axudas correspondentes.
No mesmo pleno tamén se aprobou definitivamente o orzamento municipal de 2026, que ascende a 66,2 millóns de euros. Nas contas recóllense investimentos como a intervención na travesía de Arteixo (2,2 millóns consignados dun total de 3,6), a humanización da travesía de Oseiro (420.000 euros dun proxecto estimado en preto de 700.000), a urbanización na coñecida como zona das repúblicas no núcleo de Arteixo (420.000 euros dun total de 630.000) e a humanización das rúas Domingo de Andrade e Pedro de Monteagudo (425.000 euros dun total de 550.000).
Ademais, inclúense partidas para rematar obras iniciadas en 2025 e que continuarán en 2026, como a urbanización da praza de Figueroa (pagamento final de 309.000 euros dun total de arredor de 500.000), o parque de Herbales en Chamín (330.000 euros dun total de 630.000) e a Casa de Baños do complexo do Balneario, para a que se reserva 1 millón de euros dun investimento total de 3,6 millóns, con 2 millóns procedentes de fondos europeos.