Arteixo celebra hoxe a tradicional Feira do Galo con actividades e premios
Arteixo celebra este sábado 21 de decembro a súa tradicional Feira do Galo, unha cita que comezará ás 10:00 horas e onde o galo será o protagonista indiscutible da xornada.
A programación inclúe un pasarrúas a cargo do grupo Triskel, que comezará ás 10:30 horas, e diversas actuacións musicais que animarán o evento. Entre os artistas convidados estarán Xilo & Carlos, Alejandra Pais e Melchor Rodo, que actuarán ao longo da mañá.
Ás 13:00 horas terá lugar o momento máis agardado: a entrega de premios e sorteos dos galos gañadores, que recoñecerán aos mellores exemplares vivos e ás cestas mellor preparadas. Os premios para o mellor galo vivo inclúen importes que van desde os 300 euros para o primeiro posto ata os 100 euros para o quinto. Pola súa banda, as cestas mellor preparadas serán premiadas con cantidades que oscilan entre os 275 e os 75 euros.
Con esta feira, Arteixo mantén viva unha das súas tradicións máis emblemáticas, cunha xornada onde o galo e o ambiente festivo serán os grandes protagonistas.