Arteixo avanza na redacción do novo plan xeral de urbanismo
![Imaxe de Arteixo](https://acorunaxa.com/wp-content/uploads/2024/04/Imaxe-de-Arteixo.jpg)
O Concello de Arteixo celebrou hoxe a segunda comisión de urbanismo dedicada á redacción do novo plan xeral e tamén unha mesa de contratación na que se avanzou no trámite para a contratación da nova empresa redactora. Agora falta que a comisión de expertos que apoia a mesa de contratación, composta por dous funcionarios do concello e un da Xunta de Galicia, realice un informe. A propia mesa de contratación deberá finalizar os trámites para realizar a contratación definitiva este ano.
Simultaneamente, levaranse a cabo comisións de urbanismo dedicadas ao plan xeral, nas que estarán representados todos os partidos políticos. A estas comisións incorporarase Alberto Castro como concelleiro de Urbanismo con dedicación exclusiva, que será aprobada no pleno do próximo xoves. Castro solicitou a excedencia da administración autonómica, onde traballaba na Axencia da Protección da Legalidade Urbanística (APLU), para incorporarse á administración local.
748.000 euros para a redacción do novo plan
O Concello de Arteixo substituirá así á anterior empresa redactora, que incumpriu os prazos de presentación dos traballos. Tras rescindir o seu contrato, o departamento de urbanismo redactou os novos pregos e definiu os obxectivos do novo plan, licitando a súa redacción por un total de 748.000 euros. A empresa adxudicataria terá un prazo de catro anos para realizar os traballos, con posibilidade de prórroga por un ano máis, previa aprobación do órgano de contratación. A nova empresa poderá aproveitar os documentos da anterior, que realizou cartografías e levantamentos topográficos dos núcleos de Arteixo.
Obxectivos do novo plan xeral
Os obxectivos do novo plan inclúen a preservación e posta en valor do patrimonio natural e cultural do municipio. Arteixo, inscrito na Zona de Especial Conservación (ZEC) Costa da Morte da Rede Natura 2000 e na Reserva da Biosfera Mariñas Coruñesas e Terras do Mandeo, conta con preto de 250.000 metros cadrados de zonas verdes. Entre as áreas recreativas destacan as de Barreiros, Fraga, os muíños de Sisalde, Monte de Angra, Monticaño, Seixedo, Meicende e Sabón, así como o paseo fluvial e parque do río Bolaños.
No ámbito do patrimonio cultural, o novo plan actualizará o catálogo de monumentos e conxuntos histórico-artísticos que inclúen xacementos castrexos, arquitectura relixiosa e civil. Ademais, terase en conta a posición estratéxica industrial de Arteixo, que conta cun dos volumes empresariais máis importantes de Galicia. O termo municipal está inserido nos espazos industriais da rexión da Coruña grazas á boa accesibilidade proporcionada pola AG-55 e a súa conexión coa A-6.
Infraestruturas e mobilidade
Outro dos retos do novo plan será o reforzo das infraestruturas e a mellora da mobilidade. É importante mellorar as infraestruturas viarias, enerxéticas, de servizos e as chamadas infraestruturas verdes. Ademais, será prioritario fixar poboación no rural e modernizar os tecidos urbanos e rurais, con especial atención á vivenda. Arteixo conta con catro núcleos urbanos consolidados: Meicende, Pastoriza, Vilarrodís e Arteixo, e varios núcleos rurais con crecemento disperso que comunican o municipio cos colindantes.
Este novo plan xeral busca un crecemento orgánico e sostible que preserve e potencie a riqueza natural, cultural e industrial de Arteixo.