Arteixo abre o prazo voluntario para pagar a taxa do lixo do segundo semestre de 2025
O Concello de Arteixo abriu o prazo de pago voluntario da taxa do lixo correspondente ao segundo semestre de 2025. As persoas contribuíntes poderán aboala entre o 11 de febreiro e o 15 de abril de 2026, ambos incluídos.
No caso de ter o recibo domiciliado, o cargo realizarase o 18 de febreiro de 2026. Se o documento non chega ao domicilio ou non se ve reflectido o cargo na data indicada, o consistorio pide contactar cos servizos tributarios para solicitar un duplicado no 981 600 009.
O aviso municipal insiste en que pagar fóra de prazo implica que a débeda pase á vía executiva, coas recargas correspondentes.
Este novo período de cobro chega despois da actualización da ordenanza que incrementou a taxa. A norma fixa para as vivendas unha cota anual de 125,84 euros (62,92 euros por semestre), con bonificación do 15% para fogares que participen en programas ambientais como a compostaxe individual ou a separación da fracción orgánica. En información publicada cando se aprobou o cambio, a suba situouse arredor do 28% fronte ao recibo anterior.